ਇਰਾਨ ਵਿੱਚ ਆਇਆ ਜ਼ਬਰਦਸਤ ਭੂਚਾਲ, 61 ਹਲਾਕ, 300 ਜ਼ਖ਼ਮੀ| Rv News

ਇਰਾਨ ਵਿੱਚ ਆਇਆ ਜ਼ਬਰਦਸਤ ਭੂਚਾਲ, 61 ਹਲਾਕ, 300 ਜ਼ਖ਼ਮੀ| Rv News

ਰਿਕਟਰ ਪੈਮਾਨੇ ਉੱਤੇ 7.2 ਮਾਪੀ ਗਈ ਭੂਚਾਲ ਦੀ ਗਤੀ

ਤਹਿਰਾਨ, ਇਰਾਨ, 12 ਨਵੰਬਰ (ਪੋਸਟ ਬਿਊਰੋ) : ਐਤਵਾਰ ਨੂੰ ਇਰਾਨ ਤੇ ਇਰਾਕ ਦੀ ਸਰਹੱਦ ਦੇ ਨਾਲ ਲੱਗਦੇ ਇਲਾਕੇ ਵਿੱਚ ਜਬ਼ਰਦਸਤ ਭੂਚਾਲ ਆਇਆ। ਰਿਕਟਰ ਪੈਮਾਨੇ ਉੱਤੇ ਇਸ ਦੀ ਗਤੀ 7.2 ਮਾਪੀ ਗਈ। ਭੂਚਾਲ ਕਾਰਨ ਇਰਾਨ ਵਿੱਚ 61 ਲੋਕ ਮਾਰੇ ਗਏ ਜਦਕਿ 300 ਹੋਰ ਜ਼ਖ਼ਮੀ ਹੋ ਗਏ। ਇਹ ਜਾਣਕਾਰੀ ਇਰਾਨੀ ਅਧਿਕਾਰੀਆਂ ਨੇ ਦਿੱਤੀ।

ਇਰਾਨ ਦੇ ਸਰਕਾਰੀ ਟੀਵੀ ਅਨੁਸਾਰ ਇਰਾਕੀ ਅਧਿਕਾਰੀਆਂ ਨੇ ਛੇ ਮੌਤਾਂ ਹੋਣ ਦੀ ਜਾਣਕਾਰੀ ਦਿੱਤੀ ਹੈ ਜਦਕਿ ਇਰਾਕ ਵਿੱਚ ਜ਼ਖ਼ਮੀਆਂ ਦੀ ਗਿਣਤੀ 200 ਦੱਸੀ ਗਈ ਹੈ। ਹਾਲਾਂਕਿ ਇਰਾਕੀ ਸਰਕਾਰ ਵੱਲੋਂ ਇਸ ਸਬੰਧ ਵਿੱਚ ਕੋਈ ਸਰਕਾਰੀ ਟਿੱਪਣੀ ਨਹੀਂ ਕੀਤੀ ਗਈ। ਯੂਐਸ ਜਿਓਲਾਜੀਕਲ ਸਰਵੇਅ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਭੂਚਾਲ ਦਾ ਕੇਂਦਰ ਪੂਰਬੀ ਇਰਾਕੀ ਸ਼ਹਿਰ ਹਾਲਾਬਜ਼ਾ ਤੋਂ 31 ਕਿਲੋਮੀਟਰ ਬਾਹਰਵਾਰ ਸੀ।

ਇਸਲਾਮਿਕ ਰਿਪਬਲਿਕ ਆਫ ਇਰਾਨ ਨਿਊਜ਼ ਨੈੱਟਵਰਕ ਨੇ ਦੇਸ਼ ਦੀਆਂ ਐਮਰਜੰਸੀ ਮੈਡੀਕਲ ਸਰਵਿਸਿਜ਼ ਦੇ ਮੁਖੀ ਪੀਰਹੁਸੈਨ ਕੋਲੀਵੈਂਡ ਦੇ ਹਵਾਲੇ ਨਾਲ ਦੱਸਿਆ ਕਿ 61 ਲੋਕ ਮਾਰੇ ਜਾ ਚੁੱਕੇ ਹਨ ਤੇ ਇਰਾਨ ਦੀ ਸਰਹੱਦ ਦੇ ਅੰਦਰ 300 ਲੋਕ ਜ਼ਖ਼ਮੀ ਹੋ ਗਏ ਹਨ। ਕੋਲੀਵੈਂਡ ਨੇ ਦੱਸਿਆ ਕਿ ਭੂਚਾਲ ਕਾਰਨ ਇਰਾਨ ਦੇ ਪੱਛਮੀ ਸ਼ਹਿਰ ਮੇਹਰਾਨ ਤੇ ਇਲਾਮ ਵਿੱਚ ਬਿਜਲੀ ਸਪਲਾਈ ਠੱਪ ਹੋ ਗਈ। ਉਨ੍ਹਾਂ ਇਹ ਵੀ ਦੱਸਿਆ ਕਿ 35 ਰੈਸਕਿਊ ਟੀਮਾਂ ਇਸ ਸਮੇਂ ਸਹਾਇਤਾ ਮੁਹੱਈਆ ਕਰਵਾ ਰਹੀਆਂ ਹਨ।

ਇਰਾਨ ਦੇ ਰਾਸ਼ਟਰਪਤੀ ਹਸਨ ਰੂਹਾਨੀ ਨੇ ਗ੍ਰਹਿ ਮੰਤਰੀ ਨਾਲ ਫੋਨ ਉੱਤੇ ਹੋਈ ਗੱਲਬਾਤ ਵਿੱਚ ਆਖਿਆ ਕਿ ਅਧਿਕਾਰੀਆਂ ਵੱਲੋਂ ਵੱਧ ਤੋਂ ਵੱਧ ਕੋਸਿ਼ਸ਼ ਕੀਤੇ ਜਾਣ ਦੀ ਲੋੜ ਹੈ। ਐਤਵਾਰ ਨੂੰ ਇਰਾਨੀ ਸੋਸ਼ਲ ਮੀਡੀਆ ਉੱਤੇ ਇਹ ਚਰਚਾ ਚੱਲ ਰਹੀ ਸੀ ਕਿ ਲੋਕਾਂ ਵੱਲੋਂ ਖਾਸਤੌਰ ਉੱਤੇ ਕਰਮਨਸ਼ਾਹ ਤੇ ਘਸਰ-ਏ ਸਿ਼ਰੀਨ ਵਿੱਚ ਆਪਣੇ ਘਰ ਖਾਲੀ ਕੀਤੇ ਜਾ ਰਹੇ ਹਨ। ਇਰਾਨ ਦੀ ਅਰਧ ਸਰਕਾਰੀ ਇਲਨਾ ਨਿਊਜ਼ ਏਜੰਸੀ ਨੇ ਦੱਸਿਆ ਕਿ ਇਸ ਭੂਚਾਲ ਨਾਲ ਇਰਾਨ ਦੇ 14 ਪ੍ਰੋਵਿੰਸਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਭੂਚਾਲ ਕਾਰਨ ਕਰਮਨਸ਼ਾਹ ਤੇ ਇਲਾਮ ਪ੍ਰੋਵਿੰਸਾਂ ਦੇ ਸਕੂਲਾਂ ਨੂੰ ਸੋਮਵਾਰ ਨੂੰ ਬੰਦ ਰੱਖਿਆ ਜਾਵੇਗਾ।

ਇਰਾਨ ਵਿੱਚ ਆਇਆ ਜ਼ਬਰਦਸਤ ਭੂਚਾਲ, 61 ਹਲਾਕ, 300 ਜ਼ਖ਼ਮੀ